• Esta actuación enmárcase no programa Rexurbe, grazas ao cal o Goberno galego xa adquiriu 19
inmobles en Ferrol co obxectivo de obter 38 VPP e 4 locais comerciais
• O inicio dos traballos está supeditado á concesión das licenzas municipais, solicitadas ao
Concello polo Instituto Galego da Vivenda e Solo no mes de febrero
Santiago de Compostela, 27 de outubro de 2021.- A Xunta de Galicia investirá un
total de 1.188.000 euros na rehabilitación do inmoble emprazado no número 8 da rúa Carme
Curuxeiras, en Ferrol, e na construción dun edificio destinado a vivendas nos números 22-24 da
mesma rúa.
O Instituto Galego da Vivenda e Solo (IGVS) acaba de adxudicar o contrato para a execución de
ambas obras á empresa Ogmios Proyecto, S.L., que disporá dun prazo de 15 meses para levar a cabo os
traballos.
A adquisición, rehabilitación e construción destes inmobles por parte do organismo dependente
da Consellería de Medio Ambiente, Territorio e Vivenda está incluída no programa Rexurbe, posto en
marcha no ano 2017 e no marco do cal o IGVS xa adquiriu un total de 19 inmobles no ámbito de Ferrol
Vello. De feito, trátase do municipio no que a Xunta leva adquiridos máis edificios e solares ao
abeiro deste programa co obxectivo de obter, unha vez estean completados os traballos e labores de
construción, 38 novas vivendas públicas e 4 locais comerciais.
En todo caso, o inicio das obras de rehabilitación e construción adxudicadas na rúa Carme
Curuxeiras queda condicionado á concesión das preceptivas licenzas de obra por parte do Concello de
Ferrol. Ambas licenzas foron solicitadas o pasado 2 de febreiro polo IGVS, que contestou desde
entón a todos os requirimentos realizados polos técnicos municipais.
Grazas ás obras contratadas obteranse cinco vivendas de promoción pública (VPP) destinadas a
alugueiro social. Así, no caso do inmoble de Carme Curuxeiras número 8 rehabilitaranse 3 VPP,
mentres que no número 22-24 construiranse 2 novas vivendas.
Cómpre lembrar que, ata o momento, o IGVS xa investira preto de 214.000 euros na adquisición
destes dous inmobles e na redacción dos correspondentes proxectos de rehabilitación e construción,
contía á que haberá que sumar o custo das obras que se acaban de adxudicar.