• Un dos obxectivos desta primeira lei na Comunidade é a axilización de trámites para a
recuperación de centros históricos e núcleos rurais e potenciar a rehabilitación aproveitando o
patrimonio construído e respectando o carácter histórico
• Búscase acadar unha Galicia máis atractiva para vivir, traballar e visitar, facilitando a
recuperación do construído, fomentando a cultura da rehabilitación e impulsando a dinamización
económica, social e demográfica, xa que non hai maior desprotección para unha edificación que o seu
abandono
• Entre as novidades destaca que é a primeira vez que se establece un réxime sancionador
para loitar contra as pintadas en edificacións históricas e tamén se amplían os supostos para a
concesión de licenzas directas por parte dos concellos, para fomentar a rehabilitación e
simplificar os procesos
Santiago de Compostela, 9 de xaneiro de 2019.- O Diario Oficial de Galicia publica
hoxe a primeira Lei de rehabilitación de Galicia, que entrará en vigor aos 20 días naturais da súa
publicación no DOG, é dicir, o vindeiro 22 de maio.
Un dos obxectivos principais desta normativa é axilizar a tramitación para a recuperación de
centros históricos e núcleos rurais. Esta é unha das principais novidades que recolle esta
normativa, impulsada pola Xunta sendo consciente de que non hai maior desprotección dunha
edificación que o seu abandono ou desuso, polo que se pretende incentivar e facilitar a
rehabilitación, recuperando e aproveitando o xa construído e impulsando a cultura da
rehabilitación.
O Goberno galego móstrase convencido de que con esta norma se habilita unha ferramenta para
avanzar cara a unha Galicia máis atractiva para vivir, traballar e visitar, facilitando a
recuperación do construído, fomentando a cultura da rehabilitación e impulsando a dinamización
económica, social e demográfica, é dicir, compatibilizando a protección do patrimonio coas
condicións de habitabilidade.
Crear unha cultura de rehabilitación é sinónimo de impulso á recuperación de centros
históricos e núcleos rurais que se atopan degradados, co fin de convertelos en lugares de
dinamización e revitalización económica e social; ao tempo que se conserva e protexe a paisaxe e se
valora o xa construído e se reduce a presión urbanizadora sobre a contorna.
Tal e como se establece no seu articulado, a Lei de rehabilitación, rexeneración e renovación
urbana de Galicia prevé tamén a simplificación dos trámites de intervención nas vivendas situadas
nos Camiños de Santiago. Neste sentido, no caso de que se pretenda levar a cabo unha rehabilitación
dun inmoble neste ámbito, concederase unha licenza directa, sempre que non afecte elementos
especificamente protexidos. Estes supostos rexerán tamén nos núcleos rurais e urbanos con algún
tipo de protección patrimonial.
Ademais, amplíanse os supostos de concesión de licencias directas por parte dos concellos,
sen necesidade de contar coa autorización previa da Administración autonómica, para traballos como
cambio de cuberta, actuacións en carpintarías exteriores, en fachadas ou no interior das
edificacións, sempre que non afecten valores protexidos.
Outra das novidades que incorporará o texto é que por primeira vez se establece un réxime
sancionador específico para loitar contra aquelas pintadas e graffiti que se produzan nas
edificacións históricas ou ámbitos protexidos.
Rehabilitación e rexeneración urbana
A norma diferencia dous ámbitos de actuación: por unha banda, a rehabilitación edificatoria;
e por outra, a rexeneración urbana. No primeiro caso, comprende as actuacións de recuperación de
edificios deteriorados ou que non reúnan os requisitos básicos de funcionalidade, seguridade e a
habitabilidade. Nese sentido, mantense a aposta polas áreas de rehabilitación integral para aquelas
intervencións que afecten edificios e vivendas dun ámbito declarado, podendo preverse a
urbanización dos seus espazos públicos.
En relación coa rexeneración urbana, refírese a actuacións que afectan tanto a edificios como
tecidos urbanos, podendo chegar a incluír obras de nova edificación en substitución de inmobles
previamente demolidos, procurando programas de actuación de carácter integral, con implicacións
sociais e económicas.
Fomento da rehabilitación
A primeira Lei de rehabilitación de Galicia tamén estará acompañada dun paquete de
medidas. Por unha banda, aquelas que axilizarán trámites, eliminación de trabas e coordinación
administrativa.
A modo de exemplo, destaca a declaración de áreas Rexurbe, pensada para dar resposta á
situación que presentan os ámbitos urbanos especialmente degradados que precisan dunha rápida
intervención, tanto no plano edificatorio como no social, ambiental e económico; para o que se
contará cun Centro Rexurbe, que tramite e coordine as actuacións de rehabilitación e dun Fondo
Rexurbe para o financiamento dos proxectos de rehabilitación integral.
De feito, naqueles casos concretos de edificios ou conxuntos de edificios en que sexa
necesario ou recomendable proceder a unha intervención inmediata, ábrese a posibilidade de declarar
a utilidade pública e a urxente ocupación. Por outra banda, prevense medidas de carácter financeiro
que determinarán os investimentos e fondos das administracións ás políticas de rehabilitación, as
axudas financeiras e os incentivos indirectos, como as desgravacións fiscais.