- O Goberno galego é actualmente o titular de máis do 50% dos terreos deste ámbito
- Os propietarios de solo interesados en permutar os seus terreos por edificabilidade
disporán dun prazo de dous meses para presentar as súas ofertas
- Os terreos que non se adquiran por permuta serán obxecto de expropiación unha vez que se
aprobe definitivamente a modificación do plan parcial
- A ampliación de San Paio de Navia permitirá a construción de case 1.600 vivendas
protexidas
- No segundo semestre deste ano redactarase o proxecto de urbanización e as obras
iniciaranse en 2019
Santiago de Compostela, 20 de abril de 2018.- A Xunta de Galicia adquirirá solo
para a ampliación da urbanización de San Paio de Navia, en Vigo, a través da permuta do mesmo por
edificabilidade, tal como recolle a resolución do Instituto Galego da Vivenda e Solo que hoxe
publica o Diario Oficial de Galicia.
Os propietarios de solo interesados en permutar os seus terreos por edificabilidade disporán
dun prazo de dous meses para presentar as súas ofertas. No seguinte enlace ao DOG, máis
información: https://bit.ly/2qK5Olg
A superficie mínima das propostas deberá alcanzar os 250 metros cadrados, pero existe a
posibilidade de agrupar varias parcelas, aínda que sexan de diferentes propietarios, nunha mesma
proposta.
En contrapartida polos terreos, os permutantes recibirán os dereitos de edificabilidade que
lles correspondan. Cada metro cadrado de terreo aportado permutarase por 0,6 metros de
edificabilidade nas parcelas destinadas a vivendas unifamiliares, 0,23 ou 0,25 metros de
edificabilidade nas parcelas de uso terciario e 0,57 metros cadrados de edificabilidade no resto
dos casos. Nas ofertas deberase facer constar as mazás ou parcelas de resultado nas que se pretende
materializar a edificabilidade.
Con esta oferta de permuta a Xunta avanza no proceso de adquisición de solo, despois da
oferta pública de adquisición realizada en 2016. Actualmente a Xunta de Galicia é propietaria de
136.246 metros cadrados, que supoñen máis da metade dos 265.036 metros cadrados do ámbito da
ampliación do solo residencial de San Paio de Navia.
Unha vez remate a fase de permuta, a solo restante adquirirase por expropiación despois da
aprobación definitiva da modificación do plan parcial, que se atopa en tramitación.
Ao mesmo tempo, no segundo semestre de 2018 redactarase o proxecto de urbanización, co
obxectivo de iniciar as obras en 2019. A ampliación de San Paio de Navia permitirá a construción de
preto de 1.600 vivendas protexidas.