- Adxudicaranse 14 vivendas vacantes e elaborarase unha lista de adxudicatarios para as
vivendas que poidan quedar dispoñibles nos próximos meses.
Santiago de Compostela, 12 de xaneiro de 2018.- A Xunta de Galicia adxudicará 14
vivendas de promoción pública actualmente vacantes no concello de As Pontes, unha vez que a
Comisión Provincial de Vivenda iniciou os trámites para o sorteo entre os inscritos no Rexistro de
Demandantes de Vivenda na localidade.
As vivendas a sortear están vacantes despois da renuncia dos seus adxudicatarios anteriores e
están destinadas específicamente a menores de 35 anos ou maiores de 65, en réxime de alugueiro.
O proceso iniciado permitirá ademais elaborar unha lista de adxudicatarios paras as vivendas
que queden vacantes nos próximos meses, de maneira que a adxudicación se realice o antes posible.
No sorteo, que se celebrará o 19 de febreiro próximo, extraeranse 40 expedientes do Rexistro
de Demandantes cos que, unha vez examinada a documentación para comprobar que cumpren os requisitos
establecidos, se elaborará unha lista de adxudicatarios. Unha vez publicada esta lista na web do
IGVS e no taboleiro de anuncios do concellos, os interesados poderán presentar as alegacións que
consideren oportunas.
A entrega das 14 vivendas actualmente dispoñibles realizarase unha vez rematado o proceso de
adxudicación e todos os trámites previos. No caso de renuncia dalgún adxudicatario a vivenda
correspondente adxudicarase ao primeiro da lista de espera.