§
O Goberno galego aproba as condicións do concurso público de adquisición de terreos
afectados por esta promoción, que proximamente publicará o Diario Oficial de Galicia
§
A oferta aos propietarios consistirá aboar 126 euros por metro cadrado
§
A Xunta presentou a semana pasada ante o Concello de Vigo a documentación necesaria
para desbloquear esta iniciativa mediante unha modificación do Plan Parcial que debe permitir
elevar en case 1.000 o número de vivendas protexidas que se van construír
§
Agárdase que estas dúas medidas fagan posible iniciar o vindeiro ano a urbanización
do ámbito e a construción das primeiras vivendas sociais
§
A Xunta impulsa en San Paio de Navia o maior proxecto en marcha en
Galicia para a construción de vivendas protexidas, que poderá materializarse pese ás limitacións
urbanísticas derivadas da anulación do PXOM de Vigo
O Consello da Xunta acordou hoxe destinar un total de 8 millóns de
euros á adquisición de solo en San Paio de Navia, nun novo paso no impulso do proxecto de
construción de 1.600 vivendas protexidas en Vigo. O Goberno galego aprobou hoxe as condicións do
concurso de compra dos terreos afectados por esta promoción, que proximamente fará público o Diario
Oficial de Galicia.
Na oferta pública de adquisición os terreos valóranse a 126 euros o
metro cadrado, ao que haberá que sumar o valor dos elementos existentes nas fincas, como
construcións, peches, arborado, etc. Con esta oferta, o Goberno galego respecta o prezo fixado na
resolución expropiatoria emitida pola Xunta no ano 2008 e que non chegou a materializarse a causa
das complicacións urbanísticas e das dificultades económicas.
No caso de que as propostas de venda presentadas polos propietarios do
solo superen os oito millóns de euros previstos, a contía destinada á adquisición de solo poderá
ser incrementada. Os terreos que non se poidan adquirir por compravenda serán adquiridos
posteriormente a través de permuta por edificabilidade cos propietarios ou a través de
expropiacións.
O desenvolvemento das últimas fases de San Paio de Navia fai necesaria
a modificación do seu Plan Parcial co obxectivo de aproveitar íntegramente a edificabilidade do
mesmo e incrementar en preto de 1.000 as vivendas previstas inicialmente. Con tal obxectivo o
pasado 5 de xuño a Xunta presentou no Concello de Vigo a documentación necesaria para a dita
modificación e desbloquear a construción das 1.600 vivendas protexidas en Vigo.
En total prevese que a superficie construída de vivenda protexida se
sitúe nos 189.000 metros cadrados, o distribuída entre 165 vivendas unifamiliares e 1.430 vivendas
distribuídas en bloques de edificación residencial.
A modificación do Plan Parcial tamén prevé o incremento substancial no
número de prazas de aparcadoiro público, xa que se proxectan 1.230 prazas nas fases por desenvolver
e 629 en terreos das fases xa urbanizadas, o que supón a execución de 1.859 novas prazas en San
Paio de Navia.
Unha vez impulsada a adaptación urbanística, que debe tramitar o
Concello de Vigo nos vindeiros meses, e autorizada a compra de solo, a Xunta prevé que o vindeiro
ano sexa posible iniciar as obras de urbanización do primeiro dos polígonos nos que se divide a
ampliación de San Paio de Navia e, de forma simultánea, dar comezo á construción das vivendas
protexidas.
Deste xeito, a
Xunta impulsa en San Paio de Navia o maior proxecto en marcha en Galicia para a
construción de vivendas protexidas, que poderá materializarse pese ás limitacións urbanísticas
derivadas da anulación do PXOM de Vigo